Na Fundación Roberto Rivas levamos anos acompañando persoas e proxectos que deciden emprender, crear e construír futuro desde o rural. Pero tamén sabemos algo importante: emprender no territorio non debería significar facelo en soidade.
Por iso, este 2026 damos un novo impulso a DO Territorio, unha comunidade pensada para conectar persoas, compartir experiencias e activar oportunidades desde o colectivo.
DO Territorio nace coa vontade de crear rede entre proxectos que xa existen e que están facendo territorio desde ámbitos moi diferentes: emprendemento, cultura, transformación agroalimentaria, bioeconomía, turismo, innovación social ou sustentabilidade.
Durante os próximos meses impulsaremos encontros, conversas, espazos de intercambio e pequenas accións prácticas que permitan:
- conectar persoas e proxectos
- compartir aprendizaxes reais
- detectar oportunidades de colaboración
- visibilizar iniciativas que xa están xerando impacto no rural
- fortalecer unha comunidade que medre desde a cooperación
Como primeiro paso desta nova etapa, activamos tamén un canal de WhatsApp de DO Territorio, pensado para compartir recursos, novidades, convocatorias, eventos e conversacións de interese para persoas e proxectos vinculados ao territorio.
Un espazo sinxelo para seguir conectadas no día a día e facer rede máis alá dos encontros presenciais.
Esta nova etapa de DO Territorio será posible grazas ao apoio de ECOLISE, dentro dunha iniciativa europea que impulsa comunidades rexenerativas e transicións xustas desde o local.
Máis que crear algo novo, queremos axudar a activar e fortalecer todo o que xa está acontecendo no territorio.
Porque os proxectos medran máis cando existen redes que os sosteñen.
👉 Podes unirte ao canal de WhatsApp de DO Territorio aquí: https://chat.whatsapp.com/CRZDPCxzcCn5zBFQMDFNRi
*Do Territorio é unha iniciativa da Fundación Roberto Rivas cofinanciada pola Unión Europea a través de ECOLISE
Dejar una Respuesta